Poesia

Chi perde trova.... poesia in dialetto Napoletano di Antonino Alonge

Io te credeva perza comm'a n'aco suttile

che ccade 'nterra e sfuie, e nun se trova cchiù....

Comm'a nu suonno d'oro 'e na nuttata 'abbrile,

ca passa e nun se scorda jre passata tu....

Comm'a n'addore acuto 'e rose d' 'a Turchia

ca sfuma e si nce pienze te pare d' 'o sentì ;

comm'a na bella museca, ca dint'a fantasia

torna, po' s'alluntana,... e nun vo' cchiù veni!

Ah, Sì! Accussi passaste.... Comm'a na stella 'e 'n cielo

che ccade e se va a perdere pe dint' 'a scurità....

E quanno io te penzava pareva ca nu velo

mme cummigliasse 'a mente pè mme te fa'scurdà!

Ah, sì ! Quant'era bella ! — penzava, e pe' ntramente

io nun me recurdava comme si' fatta tu!

Sta vocca, sta resata, st' uocchie accussi lucente

d' 'a mente mme sfujèvano: nun afferrava cchiù!

Ah! Che currivo! Crideme: na cosa 'e fa paura....

A chesto era arreduto pe troppo penzà a te!

Mme sarria miso a chiagnere comm'a na criatura,

cierte mumente... Proprio!, senza sapè pecche....

E tu chi sa addò stive; chi sa cu echi parlave:

chi sa cu echi redive?... Ah! core mio, chi sa?...

Chi sa si quacche vvota tu pure mme penzave

senz'odio e senz'ammore, ma sulo pe ppietà !

Ah! Quante suonne perze!

Quante nuttate chiare passate smanlanno

mme si 'custata tu !

'O ssape Ddio che llagreme cucente, amare amare,

hanno chiagnuto st'uocchie pe tte! Gesù, Gesù!

'E vvote, na carrozza passanno, int' 'a nuttata

mme deva na speranza 'e te vedé turnà;

ma quanno m'affacciava s'era già alluntanata

perdennose int'a ll'ombre d' 'a nebbia e 'a scurità;

E nne passàieno mise senza vederte maie ;

passàieno duie tre anne senza 'ncuntrarte cchiù ;

jre partuta, e io pure jette luntano assaie,

(spierto comm'a nu zingaro, comme vaie sperta tu)

purtanno dint' 'a st'ànema dannata mia pe' ssempe

nun già 'o ricordo 'e quanto male tu hè fatto a me,

ma nu ricordo meglio : chillo d' 'e primme tiempe,

quanno putette credere ca 'o Paraviso ne' è !

Io te credeva perza.... E mm'era persuaso

ca tu fusse nu suonno....

Ma nun è overo, no !

Aieri t'aggio vista! Tutta vestuta 'e raso,

chiena 'e brillante e perle, stesa int'a nu landò!

Saluto ; e resto friddo, Uà, c'o cappiello 'mmanno,

c' 'o core ca zumpava, sbattenno cumm'a cche!

Redenno hè salutato tu pure ; e po' 'a luntano

te si vutata ancora na vota,... doie... tre !

— Gesù! Ma è proprio overo ca nun te si scurdata,

ca overo qualche vvota mme pienze pure tu?...

E suspiraie, guardannote, cu ll'anema ncantata,

fermato... nfin'a quanno nun t'aggio vista cchiù.

Si' stata 'nfama, è overo; mm'hè date tante pene;

ma nun 'mporta, nun 'mporta: hè fatto assaie pe' mme!

M'abbasta ca na vota t'hè fatto vulè bene,

e ca mm'hè dato ancora 'a gioia 'e te vede...